सुर्खेत । सल्यानमा नेपाल प्रहरीको जवान तथा असइ दर्जामा जागिर खुवाइदिन्छु भन्दै ६ जनाबाट ३ लाख रुपैयाँ असुल्ने व्यक्तिलाइ प्रहरीले सल्यानको लुहामबाट पक्राउ गरेको छ ।
सल्यान कालिमाटी गाउँपाकिला २ कटविरका अन्दाजी २५ वर्षीय भोला पुन मगरले जागिरको प्रलोभनमा पारेर ३ लाख ठगी गरेको आरोपमा उनलाइ प्रहरीले पक्राउ गरेको हो ।
कालिमाटी २ टाट्केका सुशिल कुमार पुन, योगेन्द्र थापा, जनक केसी, सुरेश खत्री, नेत्रलाल केसी र महेश कुमार केसीलाई जवान र असईमा भर्ना गरी जागिर खुवाई दिने लोभ लालच र प्रलोभनमा परी प्रतिव्यक्ति ५० हजारका दरले ३ लाख ठगी गरेको आरोपमा पक्राउ गरिएको जिल्ला प्रहरी कार्यालय सल्यानका प्रहरी नायब उपरीक्षक नवीन कार्कीले जानकारी दिए ।
भोलाले आफ्नो प्रहरीका उच्च पदस्थ अधिकारीसँग राम्रो सम्पर्क रहेको र पहिले पनि धेरै जनालाई जागिर लगाई सकेकाले शतप्रतिशत काम हुन्छ भनी पीडितहरुलाई आफ्नो घरको काममा समेत लगाउने गरेको नायब उपरीक्षक कार्कीले बताए ।
पीडितहरुले कि त प्रहरीमा जागिर लगाई दिन कि त पैसा फिर्ता गर्न आग्रह गर्दा भोलाले म दिदैन, तिमिहरुले मलाई पैसा दिएका छैनौ जे गर्छौ गर भने पछि पीडितहरुले पुस ८ गते इलाका प्रहरी कार्यालय लुहाममा जाहेरी दिएका थिए ।
ए.के. सञ्चार । १३ पुष २०८०, शुक्रबार ११:२०