सुर्खेत । वीरेन्द्रनगरमा पिक्निकबाट फर्किँदै गरेको फोर्स गाडी दुर्घटनामा परी २७ जना घाइते भएका छन्।
बुधबार साँझ ६ बजेर ३५ मिनेटतिर रामघाटबाट पिक्निक खान कटकुवा गएका यात्रुहरू फर्कने क्रममा दुर्घटना भएको हो।
कर्णाली प्रदेश ०२–०१ख ०१८८ नम्बरको फोर्स गाडी वीरेन्द्रनगर नगरपालिका–७ कपासेमा रहेको श्री कालीबहादुर गणको मुख्य गेटनजिकको मोडमा अनियन्त्रित भई सडकबाट करिब १०० मिटर तल खस्दा २७ जना घाइते भएको श्री उत्तर पश्चिम पृतना हे.क्वा. निमारे व्यारेकका सूचना अधिकारी मेजर रेनु शाहले जानकारी दिइन् ।
दुर्घटनापछि घटनास्थलमै उद्धारका लागि श्री कालीबहादुर गणका सेनानी कौशल कार्कीको नेतृत्वमा र श्री नं. ४ फि ए गुल्मका डाक्टर सचित थापाको टोली खटिएकाे थिए । सेनाको टोलीले तत्कालै घाइतेहरूलाई उद्धार गरी उपचारका लागि कर्णाली प्रदेश अस्पताल पुर्याएको हो।
अस्पतालमा हाल सेनाका स्वास्थ्यकर्मीहरूले घाइतेहरूको उपचारमा सक्रिय रूपमा सहयोग गरिरहेका छन् ।
दुर्घटनाबाट भएको क्षतिको पूर्ण विवरण आउन बाँकी रहेको मेजर शाहले बताइन् ।
ए.के. सञ्चार । २१ कार्तिक २०८१, बुधबार २२:५४