सुर्खेत। दैलेखकाे गुराँस गाउँपालिका ३ र ४ अन्तर्गतका पेटारि र साकिन्धारा क्षेत्रका १ सय घरधुरीलाई गाउँपालिकाले धुवा रहित तथा दाउरा कम खपत हुने चुलो वितरण गरेको छ।
विपन्न र दलित समुदायलाई लक्षित यो पहलले स्वच्छ ऊर्जा पहुँचमा सुधार ल्याउने लक्ष्यका साथ चुलाे वितरण गरिएको हाे।
वातावरणमैत्री र स्वास्थ्यमैत्री यस्ता चुलोहरूले महिलाहरुको खाना पकाउने समय सहज बनाउने विश्वास लिइएको छ।
गाउँपालिका अध्यक्ष टोपबहादुर विसीका अनुसार,`धुवा रहित चुलोले मानिसको स्वास्थ्यमा पर्ने नकारात्मक असरलाई न्यूनीकरण गर्छ। साथै दाउराको प्रयोग घट्ने भएकाले वातावरणीय संरक्षणमा समेत टेवा पुग्छ।´
यो कार्यक्रमले दाउराको खपत घटाउँदै वनजंगलको संरक्षणमा पनि मद्दत पुर्याउने अपेक्षा गरिएको छ।
स्थानीयवासीले यसलाई सकारात्मक रूपमा लिएका छन् र यस्तो कार्यक्रमले उनीहरूको जीवनस्तर सुधारमा ठुलो सहयोग पुग्ने विश्वास व्यक्त गरेका छन्।
ए.के. सञ्चार । २२ चैत्र २०८१, शनिबार ११:२३