सुर्खेत । राष्ट्रिय भूमि आयोग सुर्खेत शाखाले दुई सरकारी कार्यालयसहित १३८ परिवारलाई जग्गाधनी पुर्जा वितरण गरेको छ । आयोगका अध्यक्ष केशव निरौलाको उपस्थितिमा आज भेरीगङ्गा नगरपालिकाका १०२ र गुर्भाकोट नगरपालिकाका ३६ घरपरिवारलाई पुर्जा वितरण गरिएको हो । 
आयोगले वितरण गरेकामध्ये दुई पुर्जा नेपाल सरकारका नाउँमा छ । अध्यक्ष निरौला, आयोगका जिल्ला अध्यक्ष श्रीधर पौड्याल, भेरीगङ्गा नगरपालिकाका उपप्रमुख रेणु आचार्यलगायतले जग्गाधनी पुर्जा वितरण गरेका थिए ।
सुर्खेतमा २०३९ सालयता भूमिहीनलाई जग्गाधनी पुर्जा वितरण गरिएको थिएन । वर्षौँपछि पुर्जा पाउँदा स्थानीयवासी खुसी देखिन्थे । जग्गाधनी पुर्जा नहुँदा विद्युत्, बैंकिङलगायत अन्यसेवा उपभोग गर्नबाट उनीहरू वञ्चित हुँदै आएका थिए ।
अध्यक्ष निरौलाले सरकारले भूमिहीन, सुकुम्वासीलाई जग्गा दिनाका साथै व्यवस्थित बसोबासका कामलाई उच्च प्राथमिकता राखेको बताए । जिल्ला अध्यक्ष पौड्यालले कर्मचारी र जनप्रतिनिधिको सहयोगले गर्दा ४० वर्षपछि पहिलोपटक भूमिहीनलाई पुर्जा वितरण गर्न आफूहरू सफल भएको बताए ।
नागरिकको वर्षौँदेखिको ठूलो समस्या समाधान उप–प्रमुख आचार्यले भनिन्, । अब नगरभित्रका बाँकी भूमिहीन सुकुम्वासीलाई जग्गा दिनाका साथै पुर्जासमेत प्रदान गर्न पहल जुटेको बताइन् ।
ए.के. सञ्चार । २६ चैत्र २०७८, शनिबार १३:४८