पाेखरा । पोखरा महानगरपालिका वडा नम्बर–३१ बेगनासतालमा एक पुरुष मृत फेला परेका छन् । उदयपुर स्थायी घर भएका अन्दाजी ३१ वर्षका अनुप भण्डारी बेगनास ताल किनारमा मृत फेला परेका हुन् ।
मृतकलाई ताल बाहिर निकालेर चेकजाँच गर्दा उनले बोकेको परिचय पत्रका आधारमा सनाखत गरिएको कास्की प्रहरीले जनाएको छ । मृतक भण्डारी नायब सुब्बा पदमा कार्यरत परराष्ट्र मन्त्रालयका कर्मचारी रहेको र उनी अविवाहित रहेको बुझिएको छ ।
भण्डारी आईतबार राती काठमाडौंबाट जहाज चढेर पोखरा आएको बताइएको छ । पोखरा आएलगत्तै उनले आफू पोखरा आएको जानकारी मोवाईल म्यासेज (सन्देश) परिवारलाई पठाएको पाइएको छ । घरबाट हिंड्दा भने उनले परिवारलाई अफिस जानु छ भनेर निस्केको पारिवारिक श्रोतलाई उद्धृत गर्दै प्रहरीले जनाएको छ ।
मृतक भण्डारीलाई बेगनास ताल किनारमा घोप्टो परेर मृत अवस्थामा देखेपछि स्थानियले प्रहरीलाई खबर गरेका थिए । अहिले भन्डारीको शवलाई पोष्टमार्टमका लागि पश्चिमाञ्चल क्षेत्रीय अस्पतालको शव गृहमा राखिएको छ । घटनाको अनुसन्धान भईरहेको कास्कीका प्रहरी प्रवक्ता प्रहरी नायव उपरीक्षक श्रवणकुमार विकले जानकारी दिए ।
ए.के. सञ्चार । २५ बैशाख २०८०, सोमबार १६:३०