काठमाडौं। महिला सशक्तीकरणसम्बन्धी संयुक्त राष्ट्रसंघीय संस्था युएन वुमनकी उपकार्यकारी निर्देशक तथा संयुक्त राष्ट्रसंघकी सहायक महासचिव न्यारद्जायी गुम्बोनज्वान्डा आफ्नो सप्ताहव्यापी नेपाल भ्रमणका लागि काठमाडौं आइपुगेकी छन्।
नेपाल भ्रमणका क्रममा उनले नेपाल सरकारका उच्चस्तरीय पदाधिकारी, संयुक्त राष्ट्रसंघीय निकायका प्रतिनिधि तथा विभिन्न साझेदार संस्थासँग भेटवार्ता गर्ने कार्यक्रम रहेको छ।
आफ्नो नेपाल बसाइमा गुम्बोनज्वान्डाले महिला, बालबालिका तथा ज्येष्ठ नागरिक मन्त्री सीता बादी तथा परराष्ट्र मन्त्री शिशिर खनालसँग शिष्टाचार भेट गरेकी छन्। भेटमा नेपालमा लैङ्गिक समानता, महिला सशक्तीकरण तथा समावेशी विकासका क्षेत्रमा भइरहेको प्रगति र चुनौतीबारे छलफल भएको युएन वुमन नेपालले जारी गरेको मिडिया दस्तावेजमा उल्लेख छ।
उनले नेपालमा युएन वुमनसहित संयुक्त राष्ट्रसंघका विभिन्न निकायले सञ्चालन गर्दै आएका कार्यक्रम र प्राथमिकताबारे जानकारी दिँदै महिलाको आर्थिक सशक्तीकरण, महिला तथा बालबालिकामाथि हुने हिंसाको अन्त्य, महिलाको नेतृत्व विकास, राजनीतिक सहभागिता अभिवृद्धि तथा शान्ति र सुरक्षामा महिलाको अर्थपूर्ण सहभागिता सुनिश्चित गर्न संस्था प्रतिबद्ध रहेको बताइन्।
साथै, लैङ्गिक समानतामैत्री नीति तथा कानुन निर्माण र कार्यान्वयनमा सहयोगलाई अझ सुदृढ बनाउँदै लैजाने पनि उनको धारणा रहेको छ।
आफ्ना भेटघाटमा गुम्बोनज्वान्डाले विशेषगरी सीमान्तकृत महिला, किशोरी तथा बालबालिकाका लागि अवसर विस्तार, आर्थिक पहुँच, नेतृत्व विकास र सुरक्षासम्बन्धी पहललाई आगामी दिनमा अझ प्रभावकारी ढंगले अघि बढाइने बताइन्।
आफू पनि फरक क्षमता भएकी र सीमान्तकृत समुदायबाट आएको उदाहरण दिँदै उनले बालविवाह अन्त्य, लैङ्गिक हिंसा रोकथाम, महिला अधिकार प्रवर्द्धन तथा सामाजिक न्यायका सवालमा बहुपक्षीय सहकार्य आवश्यक रहेको धारणा राखिन्।
नेपाल भ्रमणका क्रममा उनले संयुक्त राष्ट्रसंघीय निकाय, विकास साझेदार तथा महिला अधिकारका क्षेत्रमा काम गर्ने सरोकारवालासँग पनि भेटवार्ता गर्ने कार्यक्रम रहेको छ।
युएन वुमन नेपालले सामाजिक सञ्जालमार्फत गुम्बोनज्वान्डाको भ्रमणले नेपालमा लैङ्गिक समानता र महिला नेतृत्वसम्बन्धी सहकार्यलाई थप मजबुत बनाउने विश्वास व्यक्त गरेको छ।
