जाजरकोट। देशका एक सय उत्कृष्ट पर्यटकीय गन्तव्यमा जाजरकोटको कुशे पनि समेटिएको छ । पर्यटकीय गन्तव्यमा समेटिएसँगै पूर्वाधारका काम सुरु हुन थालेका छन् ।कुशेपाटनबाट पश्चिम नेपालका अधिकांश हिमचुचुराको अवलोकनका साथै रारा र शोक्सुण्डोसम्मको रुट कार्यक्रम हुने भएपछि यहाँका स्थानीयबासी खुसी भएका छन् । कुशेपाटन तथा हिमालमा जानका लागि चार ठाउँबाट पदमार्ग निर्माणको काम सुरु गर्न थालिएको छ ।
उत्तर पूर्वको कुशे र बारेकोटबाट, पश्चिमको जुनिचाँदे, टिकाचौरबाट पदमार्ग निर्माणका लागि पहल सुरु भएको छ । त्यस्तै पाटन तथा हिमालको माथिल्लो भागमा यात्रा गर्नका लागि अर्को पदमार्ग निर्माणको गुरु योजना रहेको छ ।
हाइअल्टिच्युटमा विभिन्न गतिविधि गर्नका लागि त्यहाँ पद मार्ग निर्माण गर्न लागिएको छ । जैविक विविधताको अवलोकनदेखि दृश्य अवलोकन, विभिन्न खेल खेल्नका लागि हाइअल्टिच्युटमै सडक निर्माणको कामलाई पनि बढी प्राथमिकता दिएर काम हुने पूर्वमन्त्री शक्तिबहादुर बस्नेतले बताए ।
विभिन्न विषयमा अध्ययन गर्ने अध्ययताका लागि वातावरण अनुकूलको व्यवस्थापन गर्न होटेल व्यवस्थापनदेखि विभिन्न अनुकूलताका कामसमेत एकै साथ सुरु हुने उनले बताए । कुशे चाखुरेबाट फोक्सुण्डो जाने पदमार्गका साथै चौधारीबाट रारा जोड्ने अर्को पदमार्गको लागि आवश्यक बजेटका साथै कार्ययोजना निर्माण भएको छ । कुशेमुसे पाटनमा तथा हिमालमा ३४ वटा चर्चित पाटन तथा तालतलैया रहेको कुशे गाउँपालिका वेबसाइटमा समेत जानकारी रहेको छ ।
यही पाटनको बीचबाट जुम्ला जोड्नका लागि सुरुङ मार्गको सम्भाव्यता अध्ययन कार्य जारी छ । शे फोक्सुण्डोदेखि रारासँग जोडिएको यो उच्च भाग पश्चिम नेपालको सबै ठाउँमा देख्न सकिने उत्कृष्ट गन्तव्यका रूपमा विकास गर्न सकिने कुरामा सरोकारवाला निकाय सहमत भएका छन् । यही हिमालबाट पग्लिएको हिउँबाट नलगाड नदी बग्ने गर्दछ ।
नलगाड नदीको सफा कञ्चन पानीबाट निर्माण हुन लागेको जलाशय युक्त नलगाड जलविद्युत् आयोजनाको ड्यामसमेत यहाँको उत्कृष्ट पर्यटन प्रवर्धनका लागि उपयुक्त स्थल बन्ने भएको छ । त्यस्तै भेरी नदीमा जलयात्रासमेत चर्चित रहँदै आएको छ ।
ए.के. सञ्चार । २९ आश्विन २०७९, शनिबार ११:१०