सुर्खेत । कालीकोटको पचालझरना गाउँपालिकाकी उपाध्यक्ष अल्किना बमलाई पालिकाले सम्मान गरेकाे छ । साेमबार एक कार्यक्रमकाे आयाेजना गरेेर पालिकाले बमलाई सम्मान गरेको हाे ।
उनले ‘सि लिड्स आइकन अवार्ड’को समग्र समूहमा दोस्रो स्थान र देशभर चौथो स्थान हासिल गरेकाे थिइन् ।
प्रधानमन्त्री केपी शर्मा ओलीको हातबाट काठमाडौंमा आयोजित समारोहमा अवार्ड प्राप्त गर्दा बमको यो उपलब्धिले महिला नेतृत्त्वका क्षेत्रमा नयाँ आशा र प्रेरणा दिएको छ।
देशभरका ७५३ स्थानीय तहमध्ये पहिलो चरणमा २७ जनाको छनोट गरिएको थियो, जसको आधारमा उपाध्यक्ष बमले एसएमएस मतका आधारमा तेस्रो चरणको नतिजामा दोस्रो स्थान हासिल गरेकाे थिइन् ।
सोही अवसरमा पचालझरना गाउँपालिकाले एक विशेष कार्यक्रम आयोजना गरेर बमलाई सम्मानित गरेको हाे ।
गाउँपालिका अध्यक्ष देवराज शाही (अग्नि) र प्रमुख प्रशासकीय अधिकृत कमल बहादुर बमसहित अन्य प्रतिनिधिहरूले उनलाई खादा लगाएर सम्मान व्यक्त गरे।
उपाध्यक्ष बमले यो सफलता समग्र गाउँपालिकाको सामूहिक प्रयासको परिणाम रहेको भन्दै सबैलाई धन्यवाद दिइन्। उनले आफ्नो आगामी प्रयासमा अझ ठूलो सहयोग र समर्थनको अपेक्षा व्यक्त गरिन्।
जनयुद्धका दौरान लामो समय जेल जीवन बिताएकी बम २०७९ सालमा पचालझरना गाउँपालिकाको उपाध्यक्ष पदमा निर्वाचित भएकी थिइन्। उनको यो सफलता कर्णाली प्रदेश मात्र नभई समग्र देशका महिला नेतृत्वका लागि प्रेरणादायी मानिएको छ।
ए.के. सञ्चार । १५ माघ २०८१, मंगलवार २३:१२