काठमाडौं । २०७५ मा निर्माण भएको फिल्म ‘रणवीर’बाट अभिनयमा डेब्यु गरेकी पूर्व मिस नेपाल सुभेक्षा खड्का फेरि फिल्ममा देखिने भएकी छन् । उनी ‘रणवीर’ निर्देशक गोविन्द सिंह भण्डारीकै फिल्म ‘प्रेमा’मा देखिने भएकी हुन् । केही सातादेखि छायाँकन भइरहेको फिल्ममा उनी शीर्ष भूमिकामा छिन् ।
फिल्म आफ्ना लागि विशेष भएको उनले बताएकी छन् । दोस्रो फिल्मका लागि आफूलाई सम्झिएकामा उनले निर्देशक भण्डारीलाई धन्यवाद समेत दिएकी छन् । यो फिल्म अगाडि निर्देशक भण्डारी रोज राणाको फिल्म ‘खलनायक २’ गर्ने तयारीमा थिए । ‘खलनायक २’ को छायांकन ढिला भएपछि भण्डारीले ‘प्रेमा’ छायांकन सुरु गरेका हुन् ।
मिस नेपाल इन्टरनेसनल २०१२ र मिस युनिभर्सिटी नेपाल वर्ल्ड २०१७ की विजेता समेत रहेकी उनले पहिलो फिल्म ‘रणवीर’ बाट भने सफलता हात पार्न सकिनन् । त्यसैले पनि होला उनलाई दोस्रो फिल्म पाउन तीन बर्ष लाग्यो ।
ए.के. सञ्चार । १३ आश्विन २०७८, बुधबार १५:३५